سەرلەبەیانی ئەمڕۆ شەممە 27-7-2024 بەڕێز مامۆستا سەلاحەدین محەممەد بەهائەدین ئەمینداری گشتی یەكگرتووی ئیسلامیی كوردستان بەیاوەری شاندێك لە ئەندامانی ئەنجومەنی جێبەجێكردن و سەركردایەتی، سەردانی قەزای سەیدصادقی كردو لەمیانەی بەشداریكردنی لە مەراسیمی ڕێزلێنان بۆ كۆمەڵێك زانا و مامۆستای ئایینی كە ساڵانێكی زۆر خزمەتیان بە مینبەر و میحرابەكانی كوردستان كردووە، ڕایگەیاند: زانایانی ئاینی مۆمی درەوشاوەی كۆمەڵگەی كوردین و ئەركی هەمولایەكمانە ڕێزلێنانیان بۆ بكەین.
لەبەشێكی تری وتەكانیدا، ئەمینداری گشتی یەكگرتووی ئیسلامیی كوردستان ئاماژەی بۆ ئەركی پیرۆزی زانایانی ئاینی و بانگخوازان و هێزو لایەن و ڕێكخراوە ئیسلامیەكان كرد لەپاراستنی شوناسی ئاینی و ئەخلاقی گەلەكەمان و ڕێگری لەهەر پیلان و شاڵاوێكی فەساد و تێكدەر كەدەیەوێ تاك و خێزانی كوردستانی دوچاری داڕوخان و شكست بكات..
هەروەها ئەمینداری گشتی یەكگرتوو جەختیشیكردەوە لەو ڕاستیەی كە هەموو ئیسلامیەكان و موحافیزكارانی نیشتیمان یەك ئامانجمان هەیە و پێكەوە ڕوبەڕوی گەندەڵی و پیلانی داروخانی ئەخلاقی دەبنەوە..
لەكۆتای دیدارەكەدا، ئاماژەی بەوەدا كە مێژووی كورد واتە مێژووی میحراب و مینبەرو حوجرەو زانایانی ئاینی كە بەسەدان زاناو كەڵەپیاوی گەورەی كورد لەڕابروودا دەرچوی زانستە شەرعیەكان بوون، جێگای شانازی ئوممەی ئیسلامیی بەگشتی و كورد بەتایبەتین، بۆیە پێویستە دەزگای زانایانی یەكگرتوو بە بەرنامەو پرۆگرامی نوێوە كار بۆ گرنگیدانی زیاتر بە زانست و علومە شەرعیەكان بكات.