ئەمینداری گشتی یەكگرتوو: وەك یەكەم حزبی مەدەنی لەدامەزراندنەوە تائێستا بەردەوام ئامادەبوین بۆ هەڵبژاردن

لەمیانەی بەشداریكردنی خولێك كە بۆ پاڵێوراوانی یەكگرتووی ئیسلامیی كوردستان بۆ پەرلەمانی كوردستان لەسنوری پارێزگاكانی سلێمانی و هەڵەبجە ئەمڕۆ شەممە 13-7-2024 سازكرابوو، بەڕێز مامۆستا سەلاحەدین محەممەد بەهائەدین ئەمنیداری گشتی یەكگرتووی ئیسلامیی كوردستان ڕایگەیاند: لەبەردەم هەڵبژاردنێكی چارەنوس سازداین و پێویستە بەگەرمی بچین بەدەمیەوە لەپێناو دەستاودەستكردنی دەسەڵات و ڕاستكردنەوەی خواروخێچی حكومڕانی هەرێمەكەمان.. ئێمە هەمیشە بەشێوەی ئاشتیانە وەك یەكەم حزبی مەدەنی لەدامەزراندنەوە هەتاوەكو ئێستا بەردەوام ئامادەبوین بۆ ئەنجامدانی هەڵبژاردنەكان.

لەبەشێكی تری وتەكانیدا، ئەمینداری گشتی یەكگرتوو جەختیكردەوە: سەرەڕای تێبینی لەسەر حكومڕانی و پرۆسەی سیاسی، بەڵام پێویستە تاكی كوردی ئامادەسازی تەواو بكات بۆ بەشداری لەپرۆسەی دەنگدان، چونكە سەرەكیترین ڕێگایە بۆ بنەبڕكردنی گەندەڵی و فەساد كە لەماوەی 30 ساڵی ڕابردوودا هەرێمەكەمان پێوەی گیرۆدەبووە.

لەكۆتای وتەكانیدا، ئەمینداری گشتی یەكگرتوو سوپاسی پاڵێوراوەكانی كردو هیوای سەركەوتنی بۆ خواستن و ئاماژەی بەوەدا خۆشبەختانە چ وەك حزب چ وەك كادر كەسی شایستەمان پالاوتووە بۆ ئەم ئەركە نیشیتانی و دەستوریە..