ئەمینداری گشتی یەكگرتوو : لە خودا داواكارم ساڵی نوێی كۆچی بكاتە ساڵی سەركەوتنی گەلانی چەوساوە و شكستی زلهێز و ستەمكارانی جیهان

 

بەرێز مامۆستا سەلاحەدین محەممەد بەهائەدین ئەمینداری گشتی یەكگرتووی ئیسلامی كوردستان بە بۆنەی هاتنەوەی سەری ساڵی (1446) كۆچی پەیامێكی پیرۆزبایی بڵاو دەكاتەوە :

بسم الله الرحمن الرحيم

إِلَّا تَنصُرُوهُ فَقَدْ نَصَرَهُ ٱللَّهُ إِذْ أَخْرَجَهُ ٱلَّذِينَ كَفَرُواْ ثَانِىَ ٱثْنَيْنِ إِذْ هُمَا فِى ٱلْغَارِ

جەماوەری ئیسلام پەروەری كوردستان

هاتنەوەی ساڵیادی هیجرەتی سەروەرمان محمد المصطفی (ﷺ) و سەری ساڵی كۆچی لە ئوممەتی ئیسلام و سەرجەم مرۆڤایەتی بە گشتی و گەلی كوردستان بەتایبەتی پیرۆز ئەكەم، لە خودای پەروەردگار داواكارم ساڵی نوێی كۆچی بكاتە ساڵی سەركەوتنی گەلانی چەوساوە و شكستی زلهێز و ستەمكارانی جیهان .. هەروەك دەخوازم لە ساڵیادی بۆنەی هیجرەتی پێغەمبەری سەردارمان (ﷺ) زۆرترین دەرس و عیبرەت وەربگرین لە لێبران و فیداكاری و بەختكردنی سەر و ماڵ لە پێناو پەیامی خودا و چەسپاندنی عەدالەت و دامەزراندنی حوكمی رەشید و پارێزگاری مافی مرۆڤ و بڵند راگرتنی پەیامی راستەقینەی ئیسلام..

هیجرەت بەو هەنگاوە گەورەیە دائەنرێت كە هێڵی جیاكەرەوەی دوو قۆناغی جیاواز و گرنگی پەیامی خودايه بۆ مرۆڤایەتی .. سەرەتای گۆرانكاریەكی گەورە بوو لە هەموو رەهەندەكانی ژیاندا .. دەستپێكی دامەزراندنی دەوڵەتی مەدینە و دەستوری پێكەوە ژیانی پێكهاتەكان بوو.

هیجرەتی پێغەمبەر و یارانی سەلمێنەری ئەوەیە كە دەبێت عەقیدە و مەبدەئو پەیامی رزگاری مرۆڤ لە پێشەوەی هەموو شتەوە بێت، بۆیەش وەك مرۆڤ ئەنجامدرا و هاوشێوەی میعراج موعجیزە نەبوو تاكو هەموو موسڵمانێك ئامادە بێت ئەنجامی بدا و شیاوی دووبارەكردنەوە بێت ..

هیوادارین ساڵی نوێی كۆچی ساڵی سەركەوتنی گەلی ستەمدیدەی فەلەستین بێت بەسەر داگیركەری مناڵ و سڤیل كوژدا.

ساڵی كۆچكردن بێت لە كۆیلەیی و پاشكۆیەتی و بەزین بۆ سەربەرزی و سەركەوتن و چالاكی و خزمەت ..

جارێكی تر ساڵیادی كۆچ و سەری ساڵی (1446) پیرۆز بێت لەگەلی ئیسلام پەروەری كوردستان و عێراق و ئوممەتی ئیسلام ..

براتان

سەلاحەدین محەممەد بەهائەدین

ئەمینداری گشتی یەكگرتووی ئیسلامی كوردستان

30/ذي الحجة /1445هجرى