لە چوارچێوەی سەردانەکەیاندا بۆ وڵاتی تورکیا بەڕێز مامۆستا سەلاحەددین محمد بەهادین ئەمینداری گشتی یەکگرتووی ئیسلامی کوردستان و وەفدی یاوەری سەردانی وەزارەتی دەرەوەی تورکیایان کرد و لە لایەن بەڕێزان نوح یڵمەز یاریدەدەری وەزیری دەرەوەی تورکیا و ئانڵ بۆرا ئینان باڵیۆزی پێشنیارکراوی نوێی کۆماری تورکیا لە عێراق پێشوازییان لێکرا.
لە بەردەوامی سەردانەکەیاندا بەڕێز مامۆستا سەلاحەددین و وەفدی یاوەری سەردانی ڕێکخراوی تورکیا و خۆرهەڵاتی ناوەڕاست تۆدافیان کرد و لە لایەن سەرۆک و ستافی کارگێڕی ڕێکخراوەکەوە پێشوازییان لێکرا پاشان بەڕێزیان لە وتەیەکدا تیشکی خستە سەر بارودۆخی گشتی عێراق و کوردستان و جەختی کردەوە لەسەر پێویستی هاوئاهەنگی و هاریکاری نێوان هەموو هێزە سیاسییەکان و کۆمەڵە و ڕێکخراوەکان بۆ خزمەتی خەڵک و گەشەدان بە گیانی پێکەوەژیان لە نێوان گەلانی عێراقدا.
هەر هەمان ڕۆژ بەڕێزیان و وەفدی یاوەری ژمارەیەک لە قوتابییانی کوردی دانیشتووی شاری ئیستەمبوڵیان بە سەر کردەوە و چەند ئاڕاستەیەکی تایبەتی پێشکەش کردن و هیوای خواست کە لە خوێندنیاندا سەرکەوتوو بن و بە دەست و زیهنی پڕەوە قۆناغەکانی خوێندنیان تەواو بکەن و بگەڕێنەوە کوردستان بۆ خزمەتی هاوڵاتییانیان.
لەلایەكی ترەوە ئەمینداری گشتی یەكگرتوو سەردانی کۆمەڵەی بانگەواز و برایەتییان کرد و لە لایەن سەرۆکی ڕێکخراوەکەوە بەڕێز دکتۆر مەعرووف چەلیک پێشوازییان لێ کرا و لە دانیشتنێکی برایانەدا بیروڕایان گۆڕییەوە دەربارەی گرنگی کاری پەروەردە و بانگەوازی ئیسلامی بە شێوەیەکی ڕەسەن و هاوچەرخانە و پێویستی ئاڵوگۆڕی ئەزموون لەوبوارەدا.
لە درێژەی سەردانەکەیاندا بەڕێزیان سەردانی ئۆفیسی مەکتەبی پەیوەندییەکانی یەکگرتووی ئیسلامی کوردستانییان لە شاری ئەنقەرە کردوو لە لایەن بەڕێزان د. لوقمان باسکەدێری بەرپرسی مەکتەب و ڕێبین نەسرەدین کارگێڕی مەکتەبەوە پێشوازییان لێکرا.
مامۆستا سەلاحەدین محەممەد بەهائەدین ئەمینداری گشتی یەكگرتوو لە نوسینگەی ئەنقەرا پێشوازییان کرد لە پرۆفیسۆر دکتۆر حەسەن ئۆکتای یاریدەدەری سەرۆکی زانکۆی ڤیزیۆن لە تورکیا و چەندین کەسایەتی تر لە چین و توێژە جیاوازەکانی وڵاتی تورکیا.
هەر لەمیانەی سەردانەكەی بۆ وڵاتی توركیا لە دوو ديدارى جیا سەردانی بارەگای سەرەکی پارتی الاتحاد الکبیریان کرد لە شاری ئەنقەرەو لە لایەن بەڕێز مستەفا دەستەچی سەرۆکی حیزب و جێگر و بەرپرسی پەیوەندییەکانیانەوە پێشوازیان لێکرا، و لەلایەكی ترەوە بارەگای سەرەکیی حیزبی ڕەفاهی نوێیان بەسەرکردەوە و لە لایەن جێگری سەرۆکی حیزبەوە دۆغان پێکین پێشوازییان لێ کرا کە لە هەمان کاتدا ئەندامی پەرلەمان و بەرپرسی پەیوەندییەکانن.
شایانی باسە لە تەواوی ئەم سەردان و دیدارانەدا مامۆستا سەلاحەدین محەممەد بەهائەدین ئەمینداری گشتی یەكگرتوو جەختی کردەوە لەسەر پێویستی کرانەوەیەکی زیاتری هێزە سیاسییە تورکی و عێراقی و کوردستانییەکان بە سەر یەکتر داو ئاڵوگۆڕی ئەزموون و بیروڕاو پرۆژەکان مەبەستی خزمەتی وڵاتەکانیان و گەلانی ناوچەکە.
