هەواڵ و چالاکی ئەنجومەنەکان

بەیاننامەیەك لەئەنجومەنی جێبەجێكردنی یەكگرتووی ئیسلامیەوە لەسەر دۆخی هەرێمی كوردستان

بەیاننامەیەك لەئەنجومەنی جێبەجێكردنی یەكگرتووی ئیسلامیەوە لەسەر دۆخی هەرێمی كوردستان


ئەنجومەنی جێبەجێكردنی یەكگرتووی ئیسلامی لەبارەی دۆخی هەرێمی كوردستان ڕاگەیەندراوێكی بڵاوكردەوەو داوا دەكات بەپەلە هێرشی راگەیاندن و جەنگی سوشیال میدایا رابگیرێت.


دەقی ڕاگەیەندراوەكە:

 

به‌یاننامه‌ی ئه‌نجومه‌نی جێبه‌جێكردنی یه‌كگرتووی ئیسلامی كوردستان تایبه‌ت به‌ بارودۆخی نه‌خوازراو و گرژیه‌كان لە هه‌رێمی كوردستان.

بسم الله الرحمن الرحیم

له‌ كاتێكدا كه‌ خه‌ڵكی كوردستان دوچاری به‌ڵایه‌كی جیهانی مه‌ترسیداربووه‌ته‌وه‌ و هه‌موولایه‌كمان به‌میله‌ت و حكومه‌ته‌وه‌ له‌ هه‌وڵی ده‌ربازبوون له‌م به‌ڵایه‌داین و مه‌ترسی ده‌رهاویشته‌ی ئابوری و كۆمه‌ڵایه‌تی و سیاسیه‌كان دایگرتووین.. به‌داخه‌وه‌ گوێ بیستی شه‌ڕی راگه‌یاندنی دوو حزبی ده‌سه‌ڵات و گه‌وره‌كردنی خاڵی ناكۆكی و گێچه‌ڵ به‌یه‌كتركردن ئه‌بین ..

ئێمه‌ له‌ یه‌كگرتووی ئیسلامی كوردستان به‌حاڵه‌تێكی هێجگار مه‌ترسیدار ده‌روانینه‌ ئه‌م دۆخه‌ و ده‌خوازین كه‌ سه‌ركردایه‌تی هه‌ردوو حزبی ده‌سه‌ڵات و سه‌رۆكایه‌تی هه‌رێم و حكومه‌ت و په‌رله‌مانی كوردستان به‌ ئه‌ركی مێژوویی خۆیان هه‌ڵسن و رێگه‌ بگرن له‌م جموجۆڵ و ده‌نگۆ نه‌شازانه‌ی باكیان به‌ چاره‌نوسی میله‌ت نیه‌ و ئاینده‌ی ئه‌م هه‌رێمه‌ به‌ره‌و نادیار و هه‌ڵدێر ئه‌به‌ن .

ئاشكرایه‌ بارودۆخی ناوچه‌كه‌ و عێراق جگه‌ له‌ شه‌ڕی ڤایرۆسی كۆڕۆنا له‌سه‌ر لێواری چه‌ندین مه‌ترسی دایه‌ و ناكرێ ئه‌م هه‌ل و مه‌رجه‌ نادیده‌ بگیرێت و به‌م شێوه‌یه‌ هه‌موو رۆژێك زه‌نگی شه‌ڕی دوو ئیداره‌یی و له‌باربردنی هه‌موو ده‌ستكه‌وته‌كان لێ بدرێ و دڵه‌راوكێ و نائومێدی باڵ بكێشێ به‌سه‌ر خه‌ڵكی ماندوو و شه‌كه‌تی كوردستاندا .

له‌ سۆنگه‌ی هه‌ست به‌ به‌رپرسیاره‌تی ئه‌خلاقی و نیشمانی یه‌وه‌ داواكارین له‌ به‌رێزان سه‌ركردایه‌تی پارتی دیموكراتی كوردستان و یه‌كێتی نیشتمانی كوردستان و سه‌رۆكایه‌تی حكومه‌ت :
1. به‌په‌له‌ هێرشی راگه‌یاندن و جه‌نگی سوشیال میدیا رابگرن .
2. هێزی پێشمه‌رگه‌ له‌ سنوری بازنه‌ی به‌ریه‌ككه‌وتن و ئه‌گه‌ری جه‌نگ دووربخه‌نه‌وه‌ .
3. كۆبوونه‌وه‌یه‌كی باڵا بكه‌ن بۆ چاره‌سه‌ری ئه‌و گله‌یی و ره‌خنانه‌ی هه‌یه‌ له‌سه‌ر یه‌كتری .
4. سه‌رۆكایه‌تی هه‌رێم رۆڵی كاراتر ببینێ له‌م بارودۆخه‌دا.
5. ئێمه‌ وه‌كو یه‌كگرتوو ئاماده‌یی هه‌ر ئه‌ركێكین له‌م باره‌یه‌وه‌..

چاوه‌رێ ی هیمه‌تی دڵسۆزانه‌ی هه‌موولایه‌كین
خودا گه‌ل و نیشتمانمان له‌ هه‌موو به‌ڵا و كاره‌ساتێك بپارێزێ ..

یه‌كگرتووی ئیسلامی كوردستان
ئه‌نجومه‌نی جێبه‌جێكردن
16/4/2020