ئه‌ڤرو ل رێكه‌فتى (12-11-2016) ل باژێرێ دهۆكێ به‌رێز (م. سه‌عید عه‌لى عه‌بۆ) سه‌رۆكێ سه‌ركردایه‌تیا یه‌كگرتوو ب ئاماده‌بوونا به‌رێزان (م. به‌شیر فه‌تاح) ئه‌ندامێ سه‌ركردایه‌تیێ و (خالد عه‌بدولصمه‌د)ئه‌ندامێ ناڤه‌ندا سیاسى و جه‌ماوه‌رى و (م. ئیسماعیل به‌روارى) به‌رپرسێ په‌یوه‌ندیێن سیاسیێن مه‌لبه‌ندێ هه‌شت یێ مویسل یێ یه‌كگرتوو ، پێشوازى ل به‌رێز (د. سه‌عید برو) یێ به‌رنیاس ب(محمود ماردینى) ئه‌میندارێ گشتى یێ ڤه‌دیتنا بنه‌مالێ ل ته‌ڤایا جیهانا ئیسلامى و ڤه‌كۆله‌رێ ئه‌رشیفێ عوسمانیان ل ئه‌سته‌نبولێ و ڤه‌كۆله‌رێ تایبه‌تمه‌ندیێ ئاینێن روژهه‌لاتى یێن گه‌ڤن مینا ئێزدیان و زه‌رده‌شتى و هندوسى و بوزیان كر .
د كڤانێ وێ پێشوازیێ دا به‌رێز (م. سه‌عید عه‌لى عه‌بۆ) سه‌رۆكێ سه‌ركردایه‌تیا یه‌كگرتوو به‌حسا ره‌وشا نافخۆیا كوردستانێ و ئیراقێ و ئۆپراسیونا كۆنترولكرنا باژێرێ مویسل ژ ده‌ستێن داعش كر و راگه‌هاند: باژێرێ مویسل ژ هه‌ر روویه‌كى ڤه گرنگیه‌كا خۆ یا تایبه‌ت ژ بۆ ئیراقێ و هه‌رێمێ كوردستانێ هه‌یه هه‌ر چى زوویه دڤێتن بهێته ئازادكرن و د ته‌وه‌ره‌كێ دنێ ئاخفتنێن خۆ دا به‌رێز سه‌رۆكێ سه‌ركردایه‌تیێ ب گرنگى به‌حسا رولێ پێشمه‌رگه‌هێ قه‌هرمان كر و گوت كو ئه‌ڤرو پێشمه‌رگه‌هێ كوردستانێ شه‌رێ مان و نه‌مانێ دكه‌ت ژ پێخه‌مه‌تى رزگاركرنا كوردستانێ ژ هه‌ر داگیركه‌ره‌كى ، هه‌ر د ته‌وه‌ره‌كێ دن ژى دا به‌حس ل كێشه و پریسگریكا چاره‌سه‌ریا ئاشتیێ ل كوردستانا باكور كر.
پاشان ژى به‌رێز (د. محمود ماردینى) سوپاسیا وان كر ژ بۆ ڤێ پێشوازیێ و خویاكر كو یه‌كگرتوویێ هه‌رده‌م پێگه‌هه‌كێ باش هه‌بوویه د گوره‌پانا سیاسى دا و ب ڤێ چه‌ندێ ژى شیایه رووله‌كێ مه‌زن د ڤه‌دیتنا ریێن چاره‌سه‌ریێ ژ بۆ پرانیا كێشه و پریسگریكان و روولێ وێ وه‌كو پارته‌كا ئیسلامى یا كوردى ب بلند نرخاند ، و ژ ئالیه‌كێ دن ژى به‌رێز (د. محمود ماردینى) به‌حس ل كاره‌ساتا مه‌زن یا ب سه‌رێ كوردێن ئێزدى دا هاتى كر و تایبه‌ت ئه‌و كچێن نها ژ ده‌ستێن داعشێ رزگاربووین و گوت: دڤێتن بله‌ز رێكه‌چاره‌ك ژ بۆ وان بهێته دیتن تاكۆ دگه‌ل جڤاكى بهێنه گونجاندن و ب گرنگێ ژى به‌حس ل روولێ ره‌وشه‌نبیریێ و پێشڤه‌چوونێ ل كوردستانێ و روژهه‌لاتا ناڤه‌راست كر و پالكشانده سه‌ر چه‌ندین ته‌وه‌ران ب گرێداى وێ ڤه .
پاشان ژى سه‌رۆكێ سه‌ركردایه‌تیێ روولێ وى گرنگ دازانین و راگه‌هاند: كو ژ كه‌ڤن دا و تا نها دناڤا ملله‌تێ كوردا گه‌له‌ك كه‌سێن مه‌زن خودان شیان و پسپور هه‌نه و بووینه نمونه‌یێن ڤى ملله‌تى و سه‌رفه‌رازن ب وان و داخازا سه‌ركه‌فتنێ و سه‌رفه‌رازیێ ژ بۆ خاست و پالپشتى و پشته‌ڤانیا خۆ یا تمام ژ بۆ ته‌كه‌ست كر.