شَهْرُ رَمَضانَ الَّذي أُنزِڵ فِیهِ الْقُرْأنُ هُدًی لِّلنَّاسِ ۆبَیِّنَاتٍ مِّنَ الْهُدَی ۆالْفُرْقَانِ
جەماوەری ئیسلام پەروەری كوردستان
بە سوپاس و شوكرانەی خودای میهرەبانەوە پێشوازی لە هاتنەوەی مانگی پیرۆزی رەمەزان ئەكەین.. مانگی ئاسودەیی و لێ بوردەیی و بەخشندەیی و رزگاربون لە ئاگر..مانگی بە خۆداچونەوە و تۆبەكاری و بریاری سەخت .. مانگی گەشەپێدانی ئیرادەی بەهێز و كەش و هەوای رۆحی و مەعنەوی .
خۆش بەختانە هەمیشە گەلی ئێمە و كۆمەڵگەی كوردەواری بایەخێكی باش و پێشوازیەكی گەرمی لەم مانگە پیرۆزە كردووە .
هەر لەم بۆنە گرنگەدا دەخوازم بە چەند خاڵێك خزمەتی هاوڵاتیان وهێز و لایەن و رێكخراوە سیاسی و چالاكوانە مەدەنیەكان بكەم و چەند داوا و پێشنیارێك بخەمە روو .
1. لەم بارودۆخە دارایی یە خراپە دا و لەم حاڵەتە پر ناسۆرەی بژێوی خەڵك و لە ئەنجامی ئەم شكستە ئابورییەی هاتووە بەسەر هەرێمەكەماندا بە دور لە جەدەلی شیكاری و دادگایی كردن .. كاتی ئەوە هاتووە هەڵمەتێكی هاوكاری و یارمەتی و لە یەكتر پرسینەوەی دارایی و كۆمەڵایەتی لە لایەن هاوڵاتیانەوە بخرێتە رێ .. لەسەر ئاستی گەرەك و گوند و شارەكان هەڵمەتێكی قەلاچۆكردنی هەژاری و هاوكاری خاوەن پێداویست و بێ نەواكان و منداڵانی بێناز ، هەلێكی گرنگە بۆ برا و خوشكانی دەست رۆیشتوو دەوڵەمەند و خوا پێداو كە بەرەكەت بخەنە كار و رزق و كاسپیەكانیان و دڵی براو خوشكانی هاونیشتمان و كەس و كاری خۆیان خۆش بكەن ..
2. دەخوازم كەش و مەناخی مەعنەوی و رۆحی پیرۆزی رەمەزان بقۆزینەوە بۆ ئاشتەوایەكی نیشتمانی لە نێوان لایەنە ناكۆك و هێزە سیاسیە ناتەباكاندا ...سەری میزان لە یەكتر نەگرین و ئیتر بەس بێ ململانێی سەلبی و قۆستنەوەی حزبی روداوەكان میللەتەكەمان مستەحەقی ئەم بێ نازی و دڵەراوكێ یە نیە ..رەمەزان دەرفەتێكی جوانە بۆ ئاشتەوایی و چونە سەر مێزی حیوار و گفتوگۆ و گەیشتن بە چارەسەر.
3. هەر لەم بۆنە پیرۆزەدا دەخوازم برا و خوشكانی چالاكوانی تۆرە كۆمەڵایەتیەكان و دەزگاكانی راگەیاندن و میدیاكاران لەم مانگە پیرۆزەدا خۆ راگربن و خۆیان لابدەن لە شەری میدیایی و ململانێ و كەرەسەی نەشیاوی ناوزراندن و كولاندنەوەی برینەكان و هەڵتەكاندنەوەی مێژوو .. جوانی و شیرینی زۆر هەیە كە خۆیانی پێوە سەرقاڵ بكەن و كەش و هەوای مەعنەوی و رۆحی رەمەزان لە خۆیان تێك نەدەن و ئاگری تێكدان و فیتنە بكوژێننەوە .كە تەنیا پێكەوە ژیانە و رێز لە یەكتر گرتنە.
لە كۆتایدا رەمەزانێكی پر لە عیبادەت و رۆژویەكی قەبوڵكراو بۆ هەمولایەك دەخوازم
براتان
صلاح الدین محمد بهاءالدین
ئەمینداری گشتی یەكگرتووی ئیسلامی كوردستان