به بۆنەی هاتنەوەی جەژنی قوربانی پیرۆزەوە بەرێز مامۆستا سەلاحەدین محەممەد بەهائەدین ئەمینداری گشتی یەكگرتووی ئیسلامی كوردستان پەیامێك بڵاو دەكاتەوە ئەمە دەقەكەیەتی :
بِسْمِ اللَّـهِ الرَّحْمَـٰنِ الرَّحِيمِ
ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ
هاتنەوەی جەژنی پیرۆزی قوربان لە جەماوەری موسڵمانی كوردستان و جیهان پیرۆز ئەكەم ..
داواكارم لە خودای پەروەردگار حەج و دوعای حاجیانمان قبوڵ بكات و ئەم جەژنەمان لێ بگێرێتەوە بە خێر و خۆشی و سەقامگیری و سەربەرزی ..
جێگای داخە كە جەژنەكەمان لە كاتێكدایە گەل و نیشتمان لە دۆخێكی دژوار و هەل و مەرجێكی هەستیاردایە و دەسەڵاتی هەرێم لە ئەنجامی هەڵەی كار و كەمتەرخەمی و بێ منەتی خۆی و پیلانی ناحەزانی دەرەكی لە ئاستی بەرپرسیاریەتیدا نیە، پێویستی بەپلانی گۆڕانکاری جیددی و چاکسازی ڕیشەیی هەیە، هەل ومەرجەکان زۆریان گۆڕاون.. بۆیە پرسی هەڵبژاردنی هەرێم بناغەی ئەو بابەتەیە، هەڵبژاردنێکی بێگەرد و بەشداریەکی فراوانی هاوڵاتیان، بە هیوای یەكڕیزی دەستە بژێری سیاسی و رۆشنبیری و هێزە نارازییەكان و دڵسۆزان بۆ رەنگ رێژی داهاتوویەكی باشتر..
هەر لەو سیاقەوە جێگەی نیگەرانیە كە ماوەیەكە جەدەلێكی نەزۆك و نازانستی كەوتوەتە سەر تۆڕە كۆمەڵایەتیەكان و خەڵكی ئیسلامخواز و دڵسۆزی نیگەرانكردووە، سەبارەت بە هێرشی ناوزراندن و بوختانكردن بۆ كەسایەتی یە رەمزەكانی موسڵمانان و زانا و ئیمامەكانی مێژووی ئوممەتی ئیسلام.
ئەم حاڵەتە ناتەندروست و نابەجێیە لە كاتێكدایە كە میللەتەكەمان و كۆمەڵگەكەمان بە دەست دەیان گرفت و قەیرانەوە دەناڵێنێ و ئوممەتی ئیسلامیش دەیان پیلان و نەخشەی دوژمنكارانەی لەسەرە..
بە بۆنەی ئەم جەژنە پیرۆزەوە داواكارم هەمولایەكەمان بە میللەت و دەسەڵات و بە سیاسی و رۆشنبیرەوە بە زانا و كەسایەتی و لایەنە ئیسلامیەكانەوە بچینەوە سەر راستە رێگای ئاینەكەمان و قورئان و سوننەت بكەینە حەكەم و عەدالەت و مافی تاك و كۆمەڵگە و بەرژەوەندی گشتی هەرێمەكەمان بكەینە ئامانج، و پێكەوە بە تەبایی و یەكڕیزی شان بدەین بەر بەرپرسیاریەتی قۆناغەكە و فریای ئەم پاشەكشێ و داڕمانە بكەوین..
جارێكی تر جەژنتان پیرۆز بێت …
براتان
صلاح الدين محمد بهاءالدين
ئەمینداری گشتی یەكگرتووی ئیسلامی كوردستان
9 ذوالحجة 1444کۆچی