لە میانەی سەردانەكەیدا بۆ قەزای سەیدسادق، ئێوارەی ئەمڕۆ شەممە 18-2-2023 كە بەیاوەری شاندێك ئەنجامیدا، بەڕێز مامۆستا سەلاحەدین محەمەد بەهائەدین ئەمینداری گشتی یەكگرتووی ئیسلامی كوردستان لەگەڵ كەسوكاری پێشینانمان كۆبویەوەو لە دیدارێكدا ڕایگەیاند: ئێمە بەسەربەرزی یادی كۆچكردوانمان دەكەینەوە، كۆچكردوانمان خێریان جێهێشتوە و انشاالله خۆشیان بۆ بەهەشتی بەرین ڕۆیشتون و كۆچكردوانمان لەچاكەو خێری ئێمە بەشدارن و خاوەن فەزڵن و پەیوەندی ئێمە لەگەڵ كۆچكردوانمان بەمردنیان تەواو نابێت و بەردەوامین لەدوعای خێربۆیان.
هەر لەمیانەی سەردانەكەیدا، مامۆستا سەلاحەدین محمد بەهائەدین لەگەڵ كابینەی مەڵبەندو لقەكانی سەیدسادق كۆبویەوەو لەدیدارێكدا ڕایگەیاند: پێویستە یەكگرتووەكان لەپێشەنگی خزمەتكردن بن بەگەلی خۆیان، یەكگرتوو بووە بە ماركەی خزمەتگوزاری و پەروەردەی تاك و خێزان، یەكگرتوو چۆن لەسەرەتای نەوەدەكان بوو بە خزمەتكاری گەلی خۆی لەكاتی قەیران و لێقەومانەكاندا، ئێستاش هەر ئەو هێزەیە كە لەكاتی قەیرانەكان ئامادەیە بۆ خزمەت و هەڵمەتی هاوكاری بۆ براكانیان لە باكور و ڕۆژئاوای كوردستان بە نمونە.
ئەوەشی خستەڕوو: یەكگرتوو لە داكۆكی لەشوناسی گەلەكەمان ڕۆڵی گەورە دەبینێت و لەپێشەوەی خەباتدایە دژی گەندەڵی و دەبێ كادرانی ئێمە لە هەركوێیەكی كاردابن نمونەی نەوعی و خزمەتگوزاری و پەیامداریدا بن.