بەبۆنەی یادی 29 ساڵەی دامەزراندنی یەكگرتووی ئیسلامی كوردستانەوە، شێخ جەعفەر شێخ مستەفا جێگری سەرۆكی هەرێمی كوردستان پەیامێكی پیرۆزبایی ئاڕاستەی ئەمینداری گشتی یەكگرتووی ئیسلامی كوردستان دەكات كە ئەمەی خوارەوە دەقی پەیامەكەیە:
جێگری سەرۆكی هەرێم پیرۆزبایی لە یەكگرتووی ئیسلامی كوردستان دەكات
لە (٢٩) هەمین ساڵیادی دامەزراندنی یەكگرتووی ئیسلامی كوردستاندا، پیرۆزباییەكی گەرم ئاراستەی بەڕێزان ئەمینداری گشتیی و ئەندامانی سەركردایەتیی و سەرجەم كادیر و لایەنگرانی یەكگرتووی ئیسلامی كوردستان دەكەم، هیوای سەركەوتنیان بۆ دەخوازم.
یەكگرتووی ئیسلامی كوردستان هەمیشە وەك پارتێكی مەدەنی میانڕەو بە سیاسەتێكی ئاشتییانە و خاوەن هەڵوێست لە سۆنگەی هەستكردن بە بەرپرسیارێتیی مامەڵەی لەگەڵ ڕووداو و پرسە هەستیارەكاندا كردووە،لە پێناو پاراستنی ئاشتیی كۆمەڵایەتی و بەرەوپێشچوونی پڕۆسەی سیاسیی و دیموكراسی.
لە ئێستادا ناوچەكەمان ڕووبەڕووی كۆمەڵێك ئاڵنگاری سیاسیی و پرسی یەكڕیزی و نیشتیمانیی و ئابووری بۆتەوە، هیواخوازم لەم یادەدا جەخت لەسەر پتەوكردنی یەكڕیزی و یەك گووتاری نێوان لایەنە سیاسییەكان بكەینەوە لە پێناو پاراستنی قەوارەی هەرێمی كوردستان و دابینكردنی ژیانێكی شایستە و ئارام بۆ خەڵكی كوردستان.
شێخ جەعفەر شێخ مستەفا
جێگری سەرۆكی هەرێمی كوردستان