بەبۆنەی یادی 29 ساڵەی دامەزراندنی یەكگرتووی ئیسلامی كوردستانەوە قوباد تاڵەبانی سەرپەرشتیاری مەكتەبی سكرتارییەتی سەرۆك مام جەلال و جێگری سەرۆكی حكومەتی هەرێمی كوردستان پەیامێكی پیرۆزبایی ئاڕاستەی ئەمینداری گشتی یەكگرتووی ئیسلامی كوردستان دەكات كە ئەمەی خوارەوە دەقی پەیامەكەیە:
بەڕێز مامۆستا سەڵاحەدین بەهادین ئەمینداری گشتی یەكگرتووی ئیسلامی كوردستان
سەركردایەتی و ئەندامان و جەماوەری یەكگرتووی ئیسلامیی كوردستان
بەبۆنەی تێپەڕبوونی بیست و نۆ ساڵ بەسەر ڕاگەیاندنی یەكگرتووی ئیسلامی كوردستان دا، پیرۆزباییتان لێ دەكەم.
یەكگرتووی ئیسلامی كوردستان وەك حزبێكی نیشتمانی و هێزێكی میانڕەو رۆڵی خۆی بینیوە لەگۆڕەپانی سیاسی كوردستاندا و هەڵگری گوتاری گرنگ بووە بۆ ئەنجامدانی چاكسازی سیاسی ڕاستەقینە.
لەم ساڵیادەدا دەخوازین پێكەوە هاندەربین بۆ هێنانەكایەی كەشی لێكتێگەیشتن و یەكڕیزی هێز و لایەنە سیاسیەكان لەپێناو پاراستنی بەرژەوەندییە باڵاكان كە ئێوەش لەیەكگرتووی ئیسلامی كوردستان هەوڵی بۆ دەدەن.
قوباد تاڵەبانی
سەرپەرشتیاری مەكتەبی سكرتارییەتی سەرۆك مام جەلال